contactez-nous
recevez notre bulletin
devenez membre
flux RSS
board login
à propos
nouvelles
événements
projets
initiatives de politiques
publications
liens
Accueil
English
Why Positive Discipline Works (Ojibway)
Embedded Scribd iPaper - Requires Javascript and Flash Player
Enable JavaScript in your browser to view this document as it was initially formatted.
ᐧᐁᐧᐁᓂ ᐅᓂᑭᐃᑯᒪᐧᐃᓐ ᒥᓂᑯᒃ ᐁᑯᑲᔥᑭᑐᔭᓐ
ᐧᐁᑯᓀᓐ ᐁᐅᒋᐧᐃᒋᐃᐧᐁᒪᑲᒃ ᐧᐁᐧᐁᓂ ᑲ ᑲᑭᑭᒪᐊᐧᓱᓇᓂᐧᐊᒃ
ᐅᐅᐧᐁ ᑲᑭᐅᔑᒋᑲᑌᒃ ᐊᓄᑭᐧᐃᓐ ᑭᐅᒋᑎᐸᐃᑲᑌ ᑲᓇᑕ ᑭᒋᐅᑭᒪ ᑲᐧᐃᑕᓄᑭᒥᑯᒡ ᐧᐃᒋᐃᐧᐁᐧᐃ ᐊᓄᑭᑕᒪᑫᐧᐃᓐ ᑲᐸᒥᓇᒧᐧᐊᒡ. ᑕᐧᓴᔦᒃ ᐃᑕᔥ ᑫᑯᓇᓐ ᑲᐃᑭᑐᒪᑲᑭᓐ ᐅᐅᒪ ᑲᑭᐅᔑᐱᐃᑲᑌᑭᓐ ᑭᐅᒋᐧᐊᓐ ᐧᐃᓂᑯ ᑲᑭᐅᔑᑐᒡ ᐅᐧᐁᓂ ᒪᓯᓇᐃᑲᓂ ᐁᑯ ᐧᐃᓐ ᑲᐃᐧᓐ ᑭᐅᒋᓯᓄᐧᐊᓐ ᑲᓇᑕ ᑭᒋᐅᑭᒪ ᐊᓄᑭᐧᐃᓂᒃ.
© 2009 CWLC
ᑲᐧᐃᓐ ᒧᔕᒃ ᓂᑭᐧᑲᔭᑯᒋᑫᓯ ᑲᐅᓂᑭᐃᑯᒪᐧᐃᔭᓐ ᔕᑯᒡ ᐧᐁᐧᐁᓂ ᓐᑐᓂᑭᐃᑯᒪᐤ ᐊᓂᔥ ᐊᒥᐱᑯ ᐁᔑᑯᒋᑐᔭᓐ.
ᒉᓄᐳᕐ, ᒪᒪᒥᒪ ᐅᑕᐱᓄᒋᔑᒪ ᓓᒃᓯ, ᐁᔾᑎᓐ ᑲᔦ ᐧᑕᕆᓐ (ᓇᓇᔾᒧ, ᐱᓯ)
ᐊᐱᒋ ᑭᒋᓀᑯᓯᐧᐊᒃ ᐅᓂᑭᐃᑯᒪᒃ ᐃᐃᒪ ᐊᐱᓄᒋᔥ ᐅᐱᒪᑎᓯᐧᐃᓂᒃ. ᐅᓂᑭᐃᑯᒪᒃ ᐅᑭᑭᓄᔥᑲᒪᐧᐊᐧᐊᓐ ᑲᔦ ᐅᑭᑭᓄᐊᒪᐧᐊᐧᐊᓐ ᐅᑕᐱᓄᒋᔑᒥᐧᐊ. ᐯᔑᒃ ᐃᐧᐁᓂ ᒪᐧᐊᒡ ᑲᓴᓇᑭᐃᑯᒡ ᐅᓂᑭᐃᑯᒪ ᒋᐱᒥ ᑲᓇᐧᐁᓂᒪᒡ ᑲᐃᔑᔭᓂᒡ ᐅᑕᐱᓄᒋᔑᒪ. ᐊᐱᓄᒋᔥ ᑲᐊᓂᒥᓯᑲᓱᒡ ᑲᐧᐃᓐ ᐅᑭᑫᑕᓯᓐ ᐁᐯᔑᑯᔭᓐ, ᐁᐅᓇᐯᒥᔭᓐ, ᐁᐧᐁᓄᑎᓯᔭᓐ ᑫᒪ ᐁᑭᑎᒪᑭᓯᔭᓐ ᔕᑯᒡ ᐃᑕᔥ ᐅᑭᑫᑕᓇᑐᒃ ᐊᓂᓐ ᐁᔑᑲᓇᐧᐊᐸᒪᒡ ᑭᔥᐱᓐ ᑲᐊᓂᒥᓯᑲᓱᒡ ᑲᔦ ᑕᔥ ᐊᓂᓐ ᐊᐸᓐ ᑫᐃᔑᓭᒡ ᑭᔥᐱᓐ ᑲᐊᓂᒥᓯᑲᓱᒡ. ᐅᐅᒪ ᒪᓯᓇᐃᑲᓂᒃ ᑲᐅᔑᐱᐃᑲᑌᑭᓐ ᑲᐅᒋ ᑭᑭᓄᐊᒪᑯᓐ ᑫᑐᑕᒪᓐ: • ᐧᐁᐧᐁᓂ ᒋᐅᓂᑭᐃᑯᒪᐃᐧᔭᓐ • ᒋᐱᒥᐧᐃᑐᑲᐧᐊᒡ ᐊᓂᓐ ᐧᐁᐧᐁᓂ ᒋᐃᔑ ᐱᒪᑎᓯᒡ ᑭᑕᐱᓄᒋᔑᒻ. • ᒋᓂᓯᑕᐧᐁᓂᒪᒡ ᑭᑕᐱᓄᒋᔑᒻ. • ᓂᓯᓐ ᑫᑯᓇᓐ ᐊᐸᒋᑐᓐ: ᑭᑌᓂᒥᐧᐁᐧᐃᓐ, ᐸᐸᒥᓯᐧᐃᓐ ᑲᔦ ᑫᐃᔑᑲᓇᐧᐊᐸᑕᒪᓐ ᒋᐅᒋ ᑭᑭᓄᔥᑲᑯᔭᓐ ᑫᑐᑕᒪᓐ ᑲᐅᓂᑭᐃᑯᒪᐃᐧᔭᓐ. • ᓂᓯᑕᐧᐁᑕᓐ ᐅᓂᑭᐃᑯᒪᐧᐃᓐ ᑲᑭᑭᐊᐸᒋᒋᑲᑌᓯᓄᒃ ᐊᐧᑲᑎᓯᐧᐃᓐ ᐧᐃᓐᑫ ᑭᐧᓀᔥ ᒥᓄᐧᐃᒋᐃᐧᐁᒪᑲᓐ.
ᑭᑭᓄᐊᒪᐧᐊᐧᐊᓱᐧᐃᓐ ᐃᔑᓂᑲᑌ ᐅᐅᐧᐁ. ᑲᐧᐃᓐ ᑕᐧᑭᒪᑲᓯᓄᓐ ᑎᐸᑯᓂᑫᐧᐃᓐ ᑭᑭᓄᐊᒪᐧᐊᐧᐊᓱᐃᐧᓂᒃ. ᑭᑭᓄᐊᒪᐧᐊᐧᐊᓱᐧᐃᓐ ᑭᑭᓄᐊᒪᑫᒪᑲᓐ. ᑎᐸᑯᓂᑫᐧᐃᓐ ᐧᐃᓴᑲᐅᐧᐁᒪᑲᓐ.
ᐧᐁᑯᓀᓐ ᐁᐅᒋᐧᐃᒋᐃᐧᐁᒪᑲᒃ ᐧᐁᐧᐁᓂ ᑲ ᑲᑭᑭᒪᐊᐧᓱᓇᓂᐧᐊᒃ
1
ᐧᐁᑯᓀᓐ ᐃᐃᐧᐁ ᒪᔭ ᑭᑭᓄᐊᒪᐧᐊᐧᐊᓱᐧᐃᓐ ᑲᐃᒋᑲᑌᒃ.
ᑭᑭᓄᐊᒪᐧᐊᐧᐊᓱᐧᐃᓐ ᑲᐃᒋᑲᑌᒃ ᐯᐸᑲᓐ ᐅᑎᔑᓂᓯᑐᑕᓇᐧᐊ ᐯᐸᑲᓐ ᐊᐧᐃᔭᒃ. ᓐᑕᐸᒋᑐᒥᓐ ᐅᐅᐧᐁ ᐃᑭᑐᐧᐃᓐ ᑕᐱᔥᑯ ᑲᐱᒥᑭᐃᐧᑕ ᐊᐱᓄᒋᔕᒃ ᑲᐊᐸᑕᓯᓄᒃ ᐊᐧᑲᑎᓯᐧᐃᓐ. ᒋᐊᐸᑕᓯᓄᒃ ᐸᑭᑌᐅᑯᐧᐃᓐ, ᐸᓯᑎᔦᐅᑯᐧᐃᓐ, ᔕᑯᒋᐃᑎᐧᐃᓐ, ᒪᒥᑭᓱᒥᐧᐁᐧᐃᓐ, ᑲᑲᒋᐃᐧᐁᐧᐃᓐ, ᓴᓭᑭᒥᐧᐁᐧᐃᓐ ᑫᒪ ᐱᐸᑭᒥᐧᐁᐧᐃᓐ. ᑭᑭᓄᐊᒪᐧᐊᐧᐊᓱᐧᐃᓐ ᑲᐊᐸᑕᒃ ᐅᓇᒋᑲᑌ ᐅᓇᑯᓂᑫᐧᐃᓇᓐ ᑫᐱᒥᓂᔕᐃᑲᑌᑭᓐ, ᐱᓯᓐᑕᒧᐧᐃᓐ, ᑲᒪᔑᓭᒃ ᑲᐧᑲᔭᑯᓂᑲᑌᒃ ᑲᔦ ᐧᐁᐧᐁᓂ ᑐᑕᒧᐧᐃᓐ ᒋᑭᑭᓇᐧᐊᐸᒥᑯᒡ ᐅᑕᐱᓄᒋᔑᒪ. ᑭ ᑭᓴᑭᐊᒥᓐ ᑭᑕᐱᓄᒋᔑᒥᓇᓂᒃ ᐧᐁᐧᐁᓂ ᒋᐧᐃᐃᔑᓭᐧᐊᒡ, ᒋᒥᐧᓀᓂᒧᐧᐊᒡ ᒣᐧᑲ ᐅᐱᑭᐧᐊᒡ, ᒋᐱᓯᑕᒧᐧᐊᒡ, ᒋᒥᓄᐧᐃᒋᐧᐃᑎᐧᐊᒡ, ᒋᓴᓴᑭᓯᓯᐧᑲ ᑲᔦ ᓄᒋᑯ ᒋᐱᐸᑭᓯᐧᑲ ᑲᔦ ᓄᒋᑯ ᒋᐧᐊᓂᔥᐧᑫᑕᑯᓯᓯᐧᑲ.
ᑲᐧᐃᓐ ᑕᑯᐊᐸᒋᒋᑲᑌᓯᓄᓐ ᐊᐧᑲᑎᓯᐧᐃᓐ ᑭᔥᐱᓐ ᐊᓐᑕᐧᐁᓂᒪᔭᒃ ᑭᑕᐱᓄᒋᔑᒥᓇᓂᒃ ᐧᐁᐧᐁᓂ ᒋᐃᔑᐱᒪᑎᓯᐧᐊᒡ. ᑭᔥᐱᓐ ᑭᐧᐊᐸᑕᐊᑲᓂᐧᐃᒡ, ᑭᐧᐊᐧᐃᓐᑕᒪᐧᐊᑲᓂᐧᐃᒡ ᑲᔦ ᑭᒋᑭᔥᑲᒪᐧᐊᑲᓂᐧᐃᒡ ᐧᐁᐧᐁᓂ ᑐᑕᒧᐧᐃᓂ ᒥᐅᒪ ᑫᑭᐅᒋ ᑭᑫᑕᒃ ᐊᐱᓄᒋᔥ ᒋᒥᐧᓀᑕᒃ ᑲᔦ ᒋᓂᑕᐧᐊᓄᑭᒡ. ᑲᐧᐃᓐ ᐊᐸᑕᓯᓄᓐ ᐸᓯᑎᔦᐅᐧᐁᐧᐃᓐ, ᐱᐸᑭᒥᐧᐁᐧᐃᓐ ᑫᒪ ᒪᒥᑭᓱᒥᐧᐁᐧᐃᓐ ᐅᐅᐧᐁ ᑎᓄᐧᐃ ᑭᑭᓄᐊᒪᐧᐊᐧᐊᓱᐧᐃᓐ.
ᔥᐱᓐ ᐊᐱᓄᒋᔕ ᒃ ᓄᑲᑎᓯᐧᐃᓂᒃ ᐃᓀᑫ ᑲᑕᔑ ᐅᑭᐱᐊᑲᓂᐧᐃᐧᐊᒡ ᑲᐧᐃᓐ ᔕᐧᑫᓂᒧᓯ ᐧᐊᒃ, ᑲᐧᐃᓐ ᒋᐸᑲᓀᓂᒪ ᐧᐊᒡ ᐊᐧᐃᔭᓐ, ᑲᐧᐃᓐ ᑲᔦ ᒋᒪᒪᔥᑲᐧᐁᓂᒧᐧᐊ ᒡ ᑲᔦ ᐧᐁᐧᐁᓂ ᐱᒥ ᑭᑭᓄᐊᒪᑯᓯᐧᐊᒃ ᑭᑭᓄᐊᒪᑎᐧᐃᓂᒃ.
ᒋᑭᔥᑲᒪᑫᐧᐃᓐ ᑫᑭᑐᑕᒪᐸᓐ ᐧᐃᐊᐸᒋᑐᔭᓐ ᒋᔑᒻ ᐊᔕ ᒋᔭᓂ
ᑭᑕᐱᓄ ᒪᐧᐊᒡ ᐊᔕ ᑲᑭᑭᓄᐊᒪᑯᓯᒡ ᓇᓄᑎᐸᐃᑲᓀᔅ ᓂᑲᓐ ᒋᐧᐃᓐᑕ ᒋᑭᔑᑐᒡ ᑫᑯᓐ ᑲᐃᔑᒋᑫᐸᓐ. ᒥᐃᒪ ᑲᔦ ᑫᐅᒋᐧᐃᒋᐃᑯᒡ ᑭᐧᐁᔦᒃ ᑲᑭᐸᐸᒧᓭᔦᒃ ᐊᐧᑲᒋᒃ. ᐅᒋᒋᓭᒃ, ᐊᒥᐃᔑᒪᒐᓐ. ᒥᐅᒪ ᑭᑐᔭᓐ. ᐊᐱ ᓇᓄᑎᐸᐃᑲᓀᔅ ᑕᐧᓴ ᐱᒥᓂᔕᐊᓐ ᑫᑯᓐ ᑲᐃ ᑭᔥᐱᓐ ᐱᒥᓂᔕᐊᒪᓐ ᑲᐃᔑᐅᓀᑕᒣᒃ ᑲᐧᐃᑐᑕᒣᒃ. ᑲᔦ ᑫᐅᒋ ᑲᔥᑭᑐᔦᒃ ᐊᔕ ᑫᑯᓐ ᒪᓐ. ᑭᔥᐱᓐ ᑲᔦ ᑲᑭᓇ ᐅᑲᑭᑫᑕᓇᐧᐊ ᑲᐧᐃᐊᓂ ᑐᑕ ᑲᐃᑭᑐᔭᓐ, ᑲᑭᓇ ᑲᐧᐃᒋᑕᒪᐧᑕ ᐧᐁᓐᑕᓐ ᒋᒥᐧᓇᒋᑲᑌᒃ. ᑲᑲᐧᑫ ᒥᐧᓇᒋᑲᑌᒃ, ᑕᑭᐅᒋ ᐊᐧᐃᔭᒃ ᐧᐃᒋᐧᑕᐧᐊᐸᓐ ᑫᑯᓐ
ᐧᐁᐧᐁᓂ ᐅᓂᑭᐃᑯᒪᐧᐃᓐ ᒥᓂᑯᒃ ᐁᑯᑲᔥᑭᑐᔭᓐ
2
ᐧᐁᑯᓀᓐ ᐃᑕᔥ ᐁᐅᒋ ᒥᓄᓭᓯᓄᒃ ᐸᓯᑎᔦᑲᓇᒋᑫᐧᐃᓐ.
ᐊᐱᓄᒋᔥ ᐧᐃᑐᑲᑫᐧᐃᓐ ᑲᐊᓄᑲᑕᒧᐧᐊᒡ ᐃᑭᑐᐧᐊᒃ ᐅᓂᔑᔑᓐ ᐊᐱᓄᒋᔥ ᒋᐅᐱᑭᐊᑲᓂᐧᐃᒡ ᓄᑲᑎᓯᐧᐃᓂᒃ. ᑲᑭ ᓇᓇᑕᐧᐃᑭᑫᑕᒧᐧᐊᒡ ᐅᐧᐁᓂ ᐅᑭᐃᔑᒥᑲᓇᐧᐊ ᐊᐧᑲᑎᓯᐧᐃᓐ ᑲᐊᐸᑕᒃ ᑕᐱᔥᑯ ᐸᓯᑎᔦᑲᓇᒋᑫᐧᐃᓐ, ᐸᑭᑌᐅᐧᐁᐧᐃᓐ, ᒪᒥᑭᓱᒥᐧᐁᐧᐃᓐ, ᔕᑯᒡ ᐃᑕᔥ ᐅᑐᒋᐊᒪᐅᑯᓐ ᐅᐧᐁ ᑲᑐᑕᐧᐊᑲᓂᐧᐃᒡ, ᑲᐧᐃᓐ ᐊᓄᑭᒪᑲᓯᓄᓐ ᑲᔦ ᐊᓐᒋᑯ ᐅᒪᔑᑐᑕᑯᓐ. ᐊᐱᓄᒋᔕᒃ ᐅᑐᒋᑭᑫᑕᓇᐧᐊ ᐧᐁᐧᐁᓂ ᒋᐃᔑᐱᒪᑎᓯᐧᐊᒡ ᑲᑲᓇᐧᐊᐸᒪᐧᐊᒡ ᑲᔦ ᑲᓇᓇᐱᓇᐧᐊᐧᐊᒡ ᐅᓂᑭᐃᑯᐧᐊᐞ, ᑲᑭᑭᓄᐊᒪᑯᐧᐊᒡ ᑲᔦ ᑯᑕᑭᔭᓐ ᑲᑭᒋᓀᓂᒪᐧᐊᒡ ᑭᒋᐊᐃ. ᑭᔥᐱᓐ ᐊᐱᓄᒋᔥ ᐸᑭᑌᐧᐊᑲᓂᐧᐃᒡ ᑕᐃᓀᑕᒻ ᒥᐱᑯ ᑫᓂᓐ ᐯᔑᐧᑲᓐ ᑫᑐᑕᐧᐊᐧᑲ ᐊᐧᐃᔭᒃ. ᑲᔦ ᐅᑲᐃᔑ ᑭᑭᓄᐊᒪᑯᓐ ᐊᐧᑲᑎᓯᐧᐃᓐ ᒋᐊᐸᒋᑐᒡ ᑲᓂᔥᑲᑎᓯᒡ ᑫᒪ ᑲᐅᒐᓂᒣᑕᒃ.
ᐊᓂᑦ ᐅᓂᑭᐃᑯᒪᒃ ᐃᓀᑕᒧᒃ ᑭᔥᐱᓐ ᐁᑲ ᐸᑭᑌᐧᐊᓯᐧᑲ, ᐊᓐᒋᑯ ᐊᐸᓐ ᐅᑕᐱᓄᒋᔑᒥᐧᐊ ᒋᒪᔑᓭᐃᑎᓱᓂᒡ ᑫᒪ ᒋᔕᔑᐱᑕᒥᓂᒡ. ᔕᑯᒡ ᐃᔑᑌᐧᐯᐧᐃᓂᐧᐊᓐ ᑭᔥᐱᓐ ᑲᓂᑕ ᐸᐸᑭᑌᐅᐧᑕ ᐊᐱᓄᒋᔕᒃ, ᐊᐧᐊᔑᒣ ᐱᑯ ᑕᐊᓂ ᒪᒥᔑᐃᑎᓱᐧᐊᒃ.
ᑭᓇᐧᐃᑦ ᑲᐅᓂᑭᐃᑯᒪᐧᐃᔭᒃ ᑭᑲᓇᐧᐊᐸᒥᑯᒥᓐ ᒋᑭᑭᓄᐊᒪᐧᐊᑭᐧᑕ ᑭᑕᐱᓄᒋᔑᒥᓇᓂᒃ ᓄᑲᑎᓯᐧᐃᓂᒃ ᐃᓀᑫ ᒋᐃᔑᐊᓄᑲᑌᒃ ᑫᑯᓐ ᑲᐃᔑ ᓴᓇᑭᓭᔭᒃ. ᑭᔥᐱᓐ ᐸᑲᓐ ᐃᔑᑲᓇᐧᐊᐸᒋᑲᑌᒃ ᑫᑯᓐ ᑕᐱᔥᑯ ᓄᑲᑎᓯᐧᐃᓂᒃ ᐃᓀᑫ, ᒣᐧᑲ ᑭᓂᔥᑲᑎᓯᔭᒃ ᑫᒪ ᑭᐅᒐᓂᒣᑕᒪᒃ ᑲᐧᐊᐸᒥᒃ ᑭᑕᐱᓄᒋᔑᒻ ᐊᓂᓐ ᐁᑐᑕᒪᓐ ᑭᓂᔥᑲᑎᓯᔭᓐ ᑫᒪ ᑭᐅᒐᓂᒣᑕᒪᓐ ᐁᐊᐸᒋᑐᓯᐧᐊᓐ ᐊᐧᑲᑎᓯᐧᐃᓐ. ᐅᑲᑭᑫᑕᓐ ᐃᑕᔥ ᐧᐁᐧᐁᓂ ᑫᐃᓇᑎᓯᒡ.
ᑭᑭᓇᐧᐊᐸᑕᐃᐧᐁᐧᐃᓐ ᑫᑭᑐ ᑕᑭᐸᓐ ᐅᓂᑭᐃᑯᒪ ᑭᓂᔥᑲᑎᓯᒡ
ᐅᓂᔑᔑᓐ ᒋᐧᐃᑕᒪᐧᐊᑎᐸᓐ ᑲᒥᑕᓱᐱᐳᓀᒡ ᑭᑕᐱᓄᒋᔑᒻ ᑲᑭᐸᓴᐊᒃ ᐧᐊᓭᒋᑲᓂ ᒣᐧᑲ ᐁᐅᓐᑕᒥᓇᐧᐁᓯᔭᓐ ᑫᑯᓐ ᒋᑭᑐ ᑕᒪᓐ ᐃᐧᐁᓂ ᑲᑭᐃᔑᒪᒪᔑᒡ. ᑕᐱᔥᑯ ᒋᑭᐃᓇᑎᐸᓐ ᒥᑕᓱᑎᐸᐃᑲᓀᔅ ᐱᐃᔑᓐ ᐱᓇ ᒪ ᒋᐊᑌᓇᐧᐁᓯᔭᓐ ᐁᑯ ᑕᔥ ᑲᑕᔑᓐᑕᒥᓐ ᐊᓂᓐ ᒪᒪᐤ ᑫᑐ ᑕᒪᒃ. ᐅᓐᒋᑕ ᐱᑯ ᐃᔑᔭᓂᐧᐊᓐ ᒋᓂ ᔥᑲᑎᓯᓇᓂᐧᐊᒃ. ᒋᐧᐃᑕᒪᐧᐊᒡ ᐃᑕᔥ ᐊᓂᓐ ᐁᓇᒪᒋᑐᔭᓐ ᑭᒧᔑᐅᐧᐃᓂᒃ, ᐸᒪ ᑭᐃᔥᐧᑲ ᐅᒐᓂᒣᑕᒪᓐ ᒋᐊᓄᑲᑕᒪᓐ ᑫᑯᓐ ᑲᑭᐃᔑᒪᔑᓭᒃ, ᐊᐸᓐ ᑕᔥ ᒋᓇᓇᑕᐧᐊᐸᑕᒪᓐ ᐊᓂᓐ ᑫᐃ ᔑ ᐧᑲᔭᑯᓭᑐᔭᓐ.
ᐧᐁᑯᓀᓐ ᐁᐅᒋᐧᐃᒋᐃᐧᐁᒪᑲᒃ ᐧᐁᐧᐁᓂ ᑲ ᑲᑭᑭᒪᐊᐧᓱᓇᓂᐧᐊᒃ
3
ᑭᓐ, ᑭᑕᐱᓄᒋᔑᒻ, ᑲᐅᒻᐱᑭᐊᐧᐊᓱᔭᓐ
ᓇᔥᑫ ᐁᒪᒥᑐᓀᑕᒪᓐ ᑭᑕᓄᑭᐧᐃᓐ ᑲᐅᓂᑭᐃᑯᒪᐧᐃᔭᓐ ᐊᓂᑦ ᑭᒋᑫᑯᓇᓐ ᑫᑭ ᓇᓇᑕᐧᐃᑭᑫᑕᒪᐸᓐ ᑕᐱᔥᑯ: • ᐊᓂᓐ ᐁᔑᐊᓐᑕᐧᐁᑕᒪᓐ ᒋᐃᔑᓇᐧᑲᒃ ᓐᑐᐱᑭᐊᐧᐊᓱᐧᐃᓐ. • ᐊᓂᓐ ᐁᔑᒥᓴᐧᐁᓂᒪᐧᑲ ᓐᑕᐱᓄᒋᔑᒪᒃ ᒋᐃᔑ ᒪᒥᑲᐧᐁᓂᒥᔑᐧᐊᒡ ᒣᐧᑲ ᑭᐱᐅᒻᐱᑭᐧᐊᒡ. • ᐁᔥᑲᒻ ᐊᐱᒋ ᑭᒪᔥᑲᐧᐃ ᑐᑭᔥᑲᑯᒥᓐ ᑕᓱᑭᔑᑲ ᑫᑯᓇᓐ ᑲᐃᔑᓭᑭᓐ. ᐊᒋᓇ ᓇᓇᑲᑕᐧᐁᑕᓐ ᒋᑲᐧᑫᒋᒥᑎᓱᔭᓐ, ᑫᔭᐱ ᓇ ᑕᑭᒋᓀᑕᐧᑲᓐ ᐅᐅᐧᐁ ᐯᔑᑯᐱᐳᓐ ᐊᓂᓂᑲᓐ. ᑭᒋᓀᑕᐧᑲᓐ ᑲᔦ ᒋᓇᓇᑲᑕᐧᐁᑕᒪᓐ ᐊᓂᓐ ᐁᔑᑭᒋᓀᑕᑯᓯᒡ ᑫᒪ ᐁᔑᐸᑲᓇᑎᓯᒡ ᑭᑕᐱᓄᒋᔑᒻ. ᒥᐅᒪ ᑲᔦ ᑫᑭᐅᒋ ᓂᓯᑕᐧᐁᓂᒪᑎᐸᓐ ᑭᑕᐱᓄᒋᔑᒻ ᑲᔦ ᑫᑭᐅᒋ ᐧᐃᒋᐃᑯᔭᓐ ᐊᓂᓐ ᐧᐁᐧᐁᓂ ᑫᑭᐃᔑ ᐊᓄᑲᓇᑎᐸᓐ ᐅᑎᓇᑎᓯᐧᐃᓂᒃ ᐃᓀᑫ. • ᐅᑲᔥᑭᑐᓐ ᐃᓇ ᑭᑕᐱᓄᒋᔑᒻ ᒋᐧᐃᒋᐧᐊᒡ ᐧᐃᒋ ᐊᐱᓄᒋᔕᓐ. • ᐊᓂᓐ ᑭᑕᐧᐊᔑᔑᒻ ᐁᔑᔥᑲᑯᒡ ᐅᔥᑭᑫᑯᓂ. ᐅᑐᒐᓂᒥᐃᑯᓐ ᐃᓇ ᑫᒪ ᐅᐧᐃᑯᑕᓐ ᐅᔥᑭᑫᑯᓂ. • ᐅᐧᐊᑫᐧᐃᓇᐧᐁᐃᑯᓐ ᐃᓇ ᑫᑯᓂ. • ᐅᒥᐧᓀᑕᓐ ᐃᓇ ᐁᐊᔭᒡ ᑲᐃᔑᐸᑎᓄᓇᓂᐧᐊᓂᒃ. ᐅᒥᐧᓀᑕᓐ ᐃᓇ ᐁᓂᔑᑫᐅᑕᒥᓄᒡ. ᑭᔥᐱᓐ ᐁᓂᓯᑕᐧᐁᓂᒪᒡ ᐊᓂᑦ ᑫᑯᓇᓐ ᑲᐃᓇᑎᓯᒡ ᑭᑕᐱᓄᒋᔑᒻ, ᑲᐧᐃᓐ ᑕᔥ ᐧᐃᓐ ᐁᑲ ᒋᐃᔑ ᐸᐱᓯᔅᑫᑕᓯᐧᐊᓐ ᐅᓄᐧᐁᓂᐧᐊᓐ ᑲᐃᓇᑎᓯᒡ. ᐃᐃᐧᐁ ᐱᑯ ᑲᐃᒋᑲᑌᒃ ᐁᓂᓯᑕᐧᐁᑕᒧᐧᐊᒡ ᐧᐁᑯᓀᓐ ᑭᑕᐱᓄᒋᔑᒻ ᐃᐃᐧᐁ ᑲᐅᒋ ᐃᓇᑎᓯᒡ.
4
ᐧᐁᐧᐁᓂ ᐅᓂᑭᐃᑯᒪᐧᐃᓐ ᒥᓂᑯᒃ ᐁᑯᑲᔥᑭᑐᔭᓐ
ᑭᑭᓄᔥᑭᑫᐧᐃᓇᓐ ᐊᓂᓐ ᐊᐱᓄᒋᔥ ᑲᐊᓂᔑᐱᒥ ᐅᐱᑭᒡ
• ᑲᓂᔓᐱᐳᓀᐧᐊᒡ ᐊᐱᓄᒋᔐᓴᒃ ᐧᐁᐧᐁᓂ ᐊᒋᓇ ᐅᐧᐃᒋᐧᐊᐧᐊᓐ ᐧᐃᒋᐊᐱᓄᒋᔕᓐ, ᒪᐧᐊᒡ ᐅᒥᐧᓀᑕᓐ ᑲᐧᐃᓐ ᐁᐃᑭᑐᒡ ᑲᔦ ᐅᓇᑕᐧᐁᑕᓐ ᑲᑭᓇ ᐊᐧᐃᔭᓐ ᒋᑭᑫᑕᒥᓂᒡ ᐊᐧᐁᓀᓐ ᐁᐅᑭᒪᐧᐃᒡ. • ᑲᓂᔓᐱᐳᓀᐧᐊᒡ ᐊᐱᓄᒋᔐᓴᒃ ᑲᐧᐃᓐ ᔕᐧᑫᓂᒧᓯᐧᐊᒃ. ᒥᐅᐧᐁ ᐁᔑ ᑭᑭᐅᐱᑭᐧᐊᒡ ᑲᔦ ᐁᓄᒋᐱᒥ ᑭᑫᑕᒧᐧᐊᒡ. ᐧᐃᓐᑫ ᑲᔦ ᐧᐊᑫᐧᐃᓇᐧᐁᓯᐧᐊᒃ ᐁᓂᔥᑲᑎᓯᓭᐧᐊᒡ. • ᑭᔥᐱᓐ ᐅᒐᓂᒣᑕᒃ ᑲᓂᔓᐱᐳᓀᒡ ᐊᐱᓄᒋᔥ ᐊᐱᒋ ᑕᐧᐃ ᐧᐊᑫᐃᐧᓇᐧᐁᓯ. • ᑲᓂᔓᐱᐳᓀᒡ ᑭᑕᐱᓄᒋᔑᒻ ᑲᐧᐃᓐ ᐅᓂᓯᑕᐧᐁᑕᓯᓐ ᒋᓴᓴᑭᓯᓯᒃ, ᓇᐧᐊᒡ ᐃᑯ ᐧᐁᐧᐁᓂ
ᐅᑕᒥᓄ ᑭᔥᐱᓐ ᑯᑕᑭᔭᓐ ᐊᐱᓄᒋᔕᓐ ᑲᐧᐃᒋᐧᐃᑯᒡ. ᑲᐧᐃᒋ • ᐊᐱ ᐊᓂ ᓂᓱᐱᐳᓀᒡ ᑲᔦ ᐊᓂ ᓂᐅᐱᐳᓀᒻ ᐊᔕ ᐅᑕᓂᑭᑫᑕᓐ ᒋᓴᓴᑭᓯᓯᒃ ᒣᐧᑲ ᐅᑕᒥᓄᒪᒡ ᐧᐃᒋᐊᐱᓄᒋᔕᓐ. • ᐧᐃᓐᑫ ᐱᑯ ᐅᒪᔥᑲᐧᐃ ᐅᑎᐯᑕᓇᐧᐊ ᐅᑐᑕᒥᐧᓇᑲᓂᐧᐊ. ᒋᓴᑲᑭᓇᒪᓐ ᐃᑕᔥ ᐊᓂᑦ ᐅᑐᑕᒥᓇᐧᐊᑲᓇᓐ ᑭᔥᐱᓐ ᑯᑕᑭᔭᓐ ᐊᐱᓄᒋᔕᒃ ᐧᐃᐱᒪᐧᐊᑎᔑᑯᒡ. • ᐊᓂᑦ ᐊᐱᓄᒋᔕᒃ ᐅᒋᒥᑯᔥᑲᑌᑕᒧᒃ ᑲᐃᔑ ᐸᑎᓄᓇᓂᐧᐊᓂᒃ ᑲᔦ ᑲᐃᔑᓱᓐᑭᑕᐧᑲᓂᓂᒃ. ᑭᔥᐱᓐ ᓇᓇᑲᒋᐊᒡ ᐊᓂᓐ ᑲᐊᓂᐃᔑᔭᒡ ᒥᐃᒪ ᐁᑲ ᑫᐅᒋ ᓂᔥᑲᑎᓯᓯᒃ. ᐁᔥᑲᒻ ᑲᐃᔑᐧᐊᐸᑕᒪᒃ ᐧᐁᐧᐁᓂ ᐁᐃᔑᔭᓯᒃ ᐊᐱᓄᒋᔥ ᑭᑐᒋ ᑲᐧᑫᐧᐃᓐᑕᒪᑯᒥᓐ ᐊᔕ ᐁᐊᓂ ᐊᔦᑯᓯᒡ. ᑕ • ᐃᔑᓭᓂ ᒋᐱᒥ ᐅᓇᑕᒪᐧᐃᐧᑕ ᐊᐱᓄᒋᔕᒃ ᑫᐃᑯᐃᔑᒋᑫᐃᐧᑕ, ᔕᑯᒡ ᑲᔦ ᒋᐸᑭᑎᓂᐧ ᒋᐧᐃᒋᐧᑕᐧᐊᒡ ᑲᐅᔑᓯᒋᑲᑌᓂᒃ ᐅᓇᑯᓂᑫᐧᐃᓇᓐ ᑲᔦ ᐸᑯᓭᓂᒧᐧᐃᓇᓐ.
ᑭᑕᐱᓄᒋᔑᒻ ᑲᐧᐃᓐ ᐊᓂᔕ ᐅᑐᑕᓯᓐ ᐃᐃᐧᐁ ᑫᑯᓐ ᑲᐃᔑᔭᒡ ᐁᐅᒋ ᑲᐧᑫ ᒥᑯᔥᑲᑌᑕᒥᐃᒃ.
ᐧᐁᑯᓀᓐ ᐁᐅᒋᐧᐃᒋᐃᐧᐁᒪᑲᒃ ᐧᐁᐧᐁᓂ ᑲ ᑲᑭᑭᒪᐊᐧᓱᓇᓂᐧᐊᒃ
5
ᐊᓂᑦ ᑫᑯᓇᓐ ᑫᑭ ᓇᓇᑲᑕᐧᐁᑕᒪᐸᓐ ᐊᐱ ᑲᑭᑭᓄᐊᒪᐧᐊᐧᐊᓱᔭᓐ
ᑭᒋᓀᑕᐧᑲᓐ ᐯᔑᐧᑲᓐ ᒋᐃᔑᐱᒥᐅᑭᐱᐊᒡ. ᑲᐧᑫᐃᔑᒋᑫᓐ ᑕᐧᓴ ᐯᔑᐧᑲᓐ ᒋᐃᔑᓇᐧᑫᑕᐧᐊᒡ. ᐅᑲᑭᑫᑕᓐ ᐃᑕᔥ ᑫᐃᔑᐊᐧᔐᓐᑕᒃ. ᐅᓀᓐᑕᓐ ᐊᓂᓐ ᑫᐃᔑᓇᐧᑫᑕᐧᐊᒡ. ᒪᔥᑲᐧᐃᑲᐸᐧᐃᓐ ᔕᑯᒡ ᑲᔦ ᑕᐱᑕ ᒋᐃᔑᑲᓇᐧᐊᐸᒪᒡ.
ᑭᔥᐱᓐ ᓇᓇᑐᓇᒪᓐ ᐊᓐᑎ ᑫᑭᐅᒋ ᓂᓯᑕᐧᐃᓇᒪᓐ ᒥᐃᒪ ᑫᑭᐅᒋ ᑭᑫᑕᒪᓐ ᑫᐃᔑ ᐧᐃᒋᐃᑯᔭᓐ ᐧᐁᐧᐁᓂ ᒋᐃᔑᐅᒻᐱᑭᐊᒡ ᑭᑕᐱᓄᒋᔑᒻ. • ᐧᐁᑯᓀᓐ ᑯᑕᒃ ᑫᑯᓐ ᐁᔑᐧᐁᐱᓯᒡ ᑭᑕᐱᓄᒋᔑᒻ. • ᑭᐅᔥᑭ ᐅᒋᒥᒋ ᓇ. • ᑭᐅᔥᑭ ᐱᓐᑎᑫᑯᓯᐧᐊᒃ ᐃᓇ ᐊᐧᐃᔭᒃ ᑭᐧᐊᑲᐃᑲᓂᒃ. • ᐸᑲᓂᓯ ᓇ ᓄᑯᒻ ᑲᓇᐧᐁᓂᒪᐧᐊᓱ ᐊᓄᑭᐊᑲᓐ. • ᐅᓇᑕᐧᐁᑕᓐ ᐃᓇ ᑭᑕᐧᐊᔑᔑᒻ ᐁᐧᐃᑯᔥᑲᐧᐊᑕᐱᒡ ᑲᐃᔑᑕᔦᒃ ᑫᒪ ᑭᓀᑕ ᐁᐧᐃ ᐧᐃᒋᐧᐃᒃ. • ᐧᐁᐧᐁᓂ ᓇ ᐧᐃᓯᓂ ᑭᑕᐧᐊᔑᔑᒻ.
ᐧᐁᐧᐁᓂ ᐃᓇᒋᑫᐧᐃᓐ ᑲᔦ ᐅᒋ ᑭᒋᐊᓄᑭᒪᑲᓐ ᑲᐃᓇᑎᓯᒡ ᐊᐱᓄᒋᔥ ᑲᔦ ᑕᔥ… ᒥᐅᒪ ᒪᐧᐊᒡ ᑫᐅᒋ ᐧᐃᑐᑲᑯᒡ ᐧᐁᐧᐁᓂ ᒋᐃᔑ ᓇᓇᑲᑕᐧᐁᑕᒃ ᑲᔦ ᒋᐃᓇᑎᓯᒡ ᑭᔥᐱᓐ ᐱᒥ ᐊᔕᒪᑲᓂᐧᐃᒡ ᑲᑭᔑᔕᐧᐃᓯᔥᑲᑫᒪᑲᑭᓐ ᒥᒋᒪᓐ.
—ᐱᕆᑎᔥ ᑎᐸᒋᒧᐧᐃᓐ ᐃᓇᓐᒋᑫᐧᐃᓐ
6
ᐧᐁᐧᐁᓂ ᐅᓂᑭᐃᑯᒪᐧᐃᓐ ᒥᓂᑯᒃ ᐁᑯᑲᔥᑭᑐᔭᓐ
ᓇᓇᑲᒋᑐᓐ ᐊᐱ ᐧᐁᐧᐁᓂ ᑲᐃᓇᑎᓯᒡ. ᐁᔥᑲᒻ ᐊᐱᓄᒋᔕᒃ ᓄᒋᑯ ᐃᔑᒋᑫᐧᐊᒃ ᒋᐱᓯᔅᑫᓂᒥᐧᑕ, ᑲᔦ ᒪᒪᔑᐧᐊᒃ ᐁᐧᐃᐅᒋ ᑲᐧᑫᐅᓐᑕᒥᐃᑯᔭᒃ. ᒥᑕᔥ ᐁᔥᑲᒻ ᐁᑕ ᐅᐅᐧᐁ ᐁᔑᐧᐊᐸᑕᒪᒃ ᑲᔦ ᐁᔑᑐᑭᑕᓐᑕᒪᒃ ᐃᐃᐧᐁ ᑲᑐᑕᒧᐧᐊᒡ. ᐧᐃᓐᑕᒪᐤ ᐁᑭᒋᓀᓂᒪᒡ ᑲᐧᐊᐸᒪᒡ ᑫᒪ ᑲᓄᑕᐧᐊᒡ ᑲᐧᑲᔭᑯᒋᑫᒡ. ᓇᓇᑲᑕᐧᐁᑕᓐ ᒣᐧᑲ ᐧᐁᐧᐁᓂ ᑲᑭᐃᔑᓭᒃ ᑭᑐᐱᑭᐊᐧᐊᓱᐧᐃᓐ. ᐊᓂᓐ ᑲᐃᔑᒋᑫᔭᓐ. • ᐧᐁᐧᐁᓂ ᓇ ᑭᑭ ᑲᑲᓄᓇ. • ᑭᑭ ᑲᑲᓄᓇ ᓇ ᒋᓂᓯᑐᑕᐧᐃᒃ ᑭᑕᐱᓄᒋᔑᒻ. • ᑭᑭ ᑲᓇᐧᐊᐸᒪ ᓇ ᑭᑕᐱᓄᒋᔑᒻ ᒣᐧᑲ ᑭᑲᑲᓄᓇᒡ. • ᑭᑭ ᑭᐧᐁᐧᐃᓇ ᓇ ᑭᑕᐱᓄᒋᔑᒻ ᒋᐧᐸ ᐊᓂᐊᔦᑯᓯᒡ ᑲᔦ ᒋᐅᒋ ᐸᑲᒋᓂᔥᑲᑎᓯᓯᒃ. • ᑭᑌᐱᓐᐧᑲᒥ ᓇ ᑭᑕᐱᓄᒋᔑᒻ ᑲᑎᐱᑲᓂᒃ. ᑭᑭ ᑭᐧᐁᓇᐧᐊ ᓇ ᑲᑭᐸᐸ ᓇᒋᐊᑕᐧᐁᐧᐃᑲᒥᑯᐧᐁᔦᒃ ᒋᐧᐸ ᐊᓂ ᐅᓴᒥ ᐊᔦᑯᓯᔦᒃ.
ᒪᒥᑲᐧᐁᑕᓐ ᑫᑯᓇᓐ ᑲᐃᔑ ᑲᔥᑭᑐᔭᓐ ᑲᐅᓂᑭᐃᑯᒪᐧᐃᔭᓐ. ᒥᐅᓄ ᑫᐧᐃᑐᑲᑯᔭᓐ ᒋᐱᒪᓄᑲᑕᒪᓐ ᑲᐅᓂᑭᐃᑯᒪᐧᐃᔭᓐ.
ᐊᐱᓄᒋᔕᒃ ᐅᓇᑕᐧᐁᑕᓇ 10 ᐊᑯᓇᒃ 12 ᑕᓱᑎᐸᐃᑲᓐ ᒋᓂᐸᐧᐊᒡ.
ᐧᐊ
ᐧᐁᑯᓀᓐ ᐁᐅᒋᐧᐃᒋᐃᐧᐁᒪᑲᒃ ᐧᐁᐧᐁᓂ ᑲ ᑲᑭᑭᒪᐊᐧᓱᓇᓂᐧᐊᒃ
7
ᑭᑌᓂᒥᐧᐁᐧᐃᓐ
ᑫᐃᔑᑲᓇᐧᐊᐸᑕᒪᓐ
ᐸᐸᒥᓯᐧᐃᓐ
ᐊᓂᑦ ᐊᐧᐃᔭᒃ ᐅᐧᐁᓐᒋᑐᓇᐧᐊ ᒋᐅᐱᑭᐊᐧᐊᓱᐧᐊᒡ ᓄᑲᑎᓯᐧᐃᓂᒃ ᐅᓄᐧᐁᓂᐧᐊᓐ ᓂᓯᓐ ᑫᑯᓇᓐ ᑲᐱᒥᓂᔕᐊᒧᐧᐊᒡ. ᒥᐅᓄ ᓂᓯᓐ ᑲᐊᐸᑕᑭᓐ ᑭᑌᓂᒥᐧᐁᐧᐃᓐ, ᑫᐃᔑᑲᓇᐧᐊᐸᑕᒪᓐ ᑲᔦ ᑫᐃᔑᑲᓇᐧᐊᐸᑕᒪᓐ.
ᑭᑌᓂᒥᐧᐁᐧᐃᓐ
ᑭᑌᓂᒥᐧᐁᐧᐃᓐ ᑲᐃᒋᑲᑌᒃ ᐧᐊᐸᑕᐃᐧᐁᒪᑲᓐ ᑲᐃᔑ ᑲᓇᐧᐊᐸᒥᑎᓇᓂᐧᐊᒃ ᑲᔦ ᑕᔥ ᐃᑯ ᑲᐃᔑ ᑲᓇᐧᐊᐸᒥᑎᓱᔭᒃ. ᑭᑌᓂᒥᐧᐁᐧᐃᓂᒃ ᑲᐃᔑ ᐱᒪᑎᓯᓇᓂᐧᐊᒃ ᐅᓇᑯᑐᓐ ᒪᓇᒋᐃᑎᐧᐃᓐ ᑭᒋᓀᓂᒥᑎᐧᐃᓐ. ᐅᐅᐧᐁ ᑎᓄᐧᐃ ᐃᑭᑐᐧᐃᓐ ᐸᑎᐧᓇ ᐧᐊᓂ ᓂᓯᑐᒋᑲᑌ. ᐃᐃᐧᐁ ᑕᔥ ᐃᔑᐧᐃᓐᒋᑫᒪᑲᓐ ᐅᓂᑭᐃᑯᒪᒃ ᑲᔦ ᐅᑕᐱᓄᒋᔑᒥᐧᐊᐞ ᐧᐁᐧᐁᓂ ᐃᔑ ᑲᓇᐧᐊᐸᒥᑎᐧᐊᒃ. ᒪᓇᒋᐃᑎᐧᐊᒃ ᑲᔦ ᑭᒋᓀᓂᒥᑎᐧᐊᒃ. ᑭᑭᓄᐊᒪᐧᐊᐧᐊᓱᐧᐃᓐ ᑲᑭᑭᐊᐸᒋᒋᑲᑌᒃ ᑭᑌᓂᒥᐧᐁᐧᐃᓂᒃ ᐅᑲᐃᔑ ᑭᑭᓄᐊᒪᑯᓇᐧᐊ ᐊᐱᓄᒋᔕᒃ ᐧᐁᐧᐁᓂ ᒋᐃᔑᐱᒪᑎᓯᐧᐊᒡ ᑲᔦ ᐧᐁᑯᓀᓐ ᐊᓂᑦ ᐅᓇᑯᓂᑫᐧᐃᓇᓐ ᐁᐅᒋᐊᔭᒪᑲᑭᓐ ᒋᐱᒥᓂᔕᐃᑲᑌᑭᓐ. ᑭᔥᐱᓐ ᑲᐸᑭᑌᐧᐊᑲᓂᐧᐃᐧᐊᒡ ᐊᐱᓄᒋᔕᒃ ᐊᓐᒋᑯ ᐅᑐᒋ ᐧᐃᓴᑲᐅᑯᓇᐧᐊ ᐁᑯ ᑲᔦ ᑕᐅᒋ ᑲᐧᑫᐸᑲᓇᑎᓯᐧᐊᒡ ᒋᑲᐧᑫ ᐧᐊᓂᑫᓐᑕᒧᐧᐊᒡ ᑲᑭᐃᔑ ᐧᐃᓴᑫᑕᒥᐊᐧᑕ. ᑫᒪ ᑲᔦ ᐅᑲᐊᓂᑐᑕᓇᐧᐊ ᒋᑭᒧᒋᒋᑫᐧᐊᒡ ᐁᑲ ᒋᑲᒋᑎᓂᐧᑕ ᑫᑯᓐ ᑲᐃᔑᐱᒋ ᐧᐊᓂᑐᑕᒧᐧᐊᒡ. ᑭᑌᓂᒥᐧᐁᐧᐃᓐ ᐃᔑ ᑲᓇᐧᐊᐸᒋᑫᒪᑲᓐ ᑲᐊᐱᑕᑎᓯᒡ ᐊᐱᓄᒋᔥ. ᑭᑭᑫᑕᒥᓐ ᐯᐸᑲᓐ ᐁᐃᓇᑎᓯᐧᐊᒡ ᑭᐱᒥ ᐊᑲᔑᔑᒡ ᐱᓂᔥ ᒋᐧᐸ ᐊᓂᒪᒋ ᑭᑭᓄᐊᒪᑯᓯᒡ ᑲᔦ ᐃᑭᐧᐁᓂᐧᐊᒃ ᓇᐧᐊᒡ ᐊᔕ ᑲᐊᓂ ᒪᒪᑎᑐᐧᐊᒡ ᑭᒋᐊᐱᓄᒋᔕᒃ ᐱᓂᔥ ᑲᐊᓂ ᑭᒋᐅᔥᑭᓂᑭᓯᐧᐃᐧᐊᒡ. ᑭᑌᓂᒥᐧᐁᐧᐃᓐ ᑲᑭᑭᐊᐸᑕᒃ ᑭᑭᓄᐊᒪᐧᐊᐧᐊᓱᐧᐃᓂᒃ ᐅᐧᐃᑐᑲᑯᓇᐧᐊ ᐊᐱᓄᒋᔕᒃ ᐊᓂᓐ ᑫᑐᑕᒧᐧᐊᒡ ᑲᔦ ᐧᐁᑯᓀᓐ ᑲᐅᒋᐃᔑᓭᒃ ᒋᑐᑕᒧᐧᐊᒡ.
8
ᐧᐁᐧᐁᓂ ᐅᓂᑭᐃᑯᒪᐧᐃᓐ ᒥᓂᑯᒃ ᐁᑯᑲᔥᑭᑐᔭᓐ
ᑭᐊᑲᔑᔑᒡ ᐊᐱᓄᒋᔥ ᐊᐱᒋ ᐧᐊᑫᐧᐃᓇᐧᐁᓯ. ᓇᑕᐧᐁᑕᒻ ᒋᑕᐧᐃᔥᑲᒪᐧᐊᑲᓂᐧᐃᒡ ᑫᑯᓐ ᒋᐊᓂᔑᑲᔥᑭᑐᒡ. ᓇᔥᑫ ᑕᐱᔥᑯ ᒋᑭᑭᔥᑭᑫᐊᒡ ᑫᐧᐁᓐᒋᑐᒡ ᒋᐱᒋᑯᓀᒡ ᑲᔦ ᒋᑭᒋᑯᓀᒡ. ᐊᐱᓄᒋᔥ ᐅᑭᒋᓀᑕᓐ ᑲᐧᐊᐧᐃᒋᐃᐧᐁᒡ. ᒋᒥᓇᒡ ᐃᑕᔥ ᑫᑯᓇᓐ ᑲᐧᐁᓐᑕᓂᑭᓐ ᒋᑐᑕᒃ ᑕᐱᔥᑯ ᒋᐅᓇᓴᒃ ᐁᒥᐧᑲᓇᓐ ᐊᑐᐳᐧᐃᓇᑎᑯᒃ. ᑭᒋᓀᓂᒥᑯᒃ ᐊᐱᓄᒋᔐᓴᒃ. ᐧᐁᐧᐁᓂ ᒋᑲᑲᓄᓇᐧᑕ ᑲᔦ ᑫᑯᐧᐃᓐ ᓄᒋᑯ ᐊᐃᓇᒋᒪᑫᓐ ᒣᐧᑲ ᑭᐯᐧᔕᐸᒪᒡ. ᐅᔥᑭᓂᑭᓴᒃ ᑲᐧᐃᓐ ᐅᒥᐧᓀᑕᓯᓇᐧᐊ ᒋᓇᓇᑲᒋᐃᐧᑕ. ᑫᑯᐧᐃᓐ ᑭᒧᒋᐊᑭᓐᑕᒧ ᐅᑐᔑᐱᐊᒪᑯᐧᐃᓇᓐ ᑫᒪ ᐱᓯᓐᑕᐤ ᒣᐧᑲ ᑭᑲᑭᑭᑐᒡ ᑭᑭᑐᐧᐃᓂᒃ.
ᑭᔥᐱᓐ ᑭᑌᓂᒥᐧᐁᐧᐃᓂᒃ ᐃᔑᐧᐊᐸᑕᐊᔭᒃ ᑭᑕᐱᓄᒋᔑᒥᓇᓂᒃ ᐅᑲᑭᑌᓂᒪᐧᐊᓐ ᐸᑲᓐ ᐊᐧᐃᔭᓐ ᑲᔦ ᑫᑭᓇᐧᐃᑦ ᑲᑭᑌᓂᒥᑯᒥᓐ.
_
9
ᑫᐃᔑᑲᓇᐧᐊᐸᑕᒪᓐ
ᑫᑯᓐ ᑲᐃᔑᑲᓇᐧᐊᐸᑕᒪᒃ ᒥᐅᒪ ᐁᐅᒋ ᐧᐊᐧᐃᓐᑕᒪᑎᔭᒃ ᑫᑯᓇᓐ. ᑭᒋᓀᑕᐧᑲᓐ ᑕᔥ ᒋᑲᑲᓄᓇᔭᒃ ᑭᑕᐱᓄᒋᔑᒥᓇᓂᒃ ᑲᔦ ᒋᐱᓯᓐᑕᐧᐊᔭᒃ. ᑭᒋᓀᑕᐧᑲᓐ ᒋᐧᐃᓐᑕᒪᐧᐃᐧᑕ ᐊᐱᓄᒋᔕᒃ ᒋᓂᓯᑐᑕᒧᐧᐊᒡ ᑭᑎᐯᓐᒋᑫᐧᐃᓂᒃ ᑭᑐᓇᑯᓂᑫᐧᐃᓇᓐ ᑲᔦ ᑭᐸᑯᓭᑕᒧᐧᐃᓇᓐ. ᐊᓂᑦ ᑎᐯᓐᒋᑫᐧᐃᓇᓐ ᐃᔑᒋᑫᐧᐊᒃ ᐁᓂᐱᑌᐊᒧᐧᐊᒡ ᑫᐱᒥᓂᔕᐊᒧᐧᐊᒡ ᐅᓇᑯᓂᑫᐧᐃᓇᓐ ᐁᐊᓴᒪᑯᑐᐧᐊᒡ ᑫᐃᔑᐧᐊᐸᑕᒧᐧᐊᒡ. ᐊᐱᓄᒋᔕᒃ ᐊᐱᒋ ᐅᐧᐊᑫᐧᐃ ᐧᐊᓂᔥᐧᑫᐃᑯᓇᐧᐊ ᑫᑯᓇᓐ, ᐁᑯ ᑕᔥ ᐊᐱ ᑲᑲᓄᓇᐧᑕ ᒐᐧᑲᑐᓐ ᑫᑯᓐ ᑲᐃᓇᒡ, ᑲᐧᐁᓐᓯᑕᐧᑲᑭᓐ ᐃᑭᑐᐧᐃᓇᓐ ᐊᐸᒋᑐᓐ ᑲᔦ ᒋᒐᐧᑲᑐᔭᓐ ᑲᐃᔑᐧᐃᓐᑕᒪᐧᐊᒡ. ᒋᐧᐸ ᓴᑲᐊᒪᓐ ᑭᐧᐊᑲᐃᑲᓂᒃ, ᑫᒋᓇᒡ ᒋᒪᒥᑲᐧᐊᓱᒪᐧᑕ ᐊᐱᓄᒋᔕᒃ ᐊᓂᓐ ᐁᔑᐸᑯᓭᓂᒪᐧᑕ ᒋᑐᑕᒧᐧᐊᒡ.
• ᐊᐱ ᑭᑲᑲᓄᓇᒡ ᑭᑕᐱᓄᒋᔑᒻ ᐃᐃᐧᐁ ᐱᑯ ᐊᐱᑕᑎᓯᒡ ᐃᔑᑲᑲᓄᔥ. • ᒋᐧᐃᑕᐱᒪᒡ ᐊᑐᐳᐧᐃᓇᑎᑯᒃ ᑫᒪ ᒋᓇᐧᐊᑭᑕᔭᓐ ᒋᐅᒋ ᑲᓇᐧᐊᐸᒥᑎᔦᒃ ᑭᔥᑭᔑᑯᐧᐊ. ᑲᐧᐃᓐ ᑲᑭ ᐱᓯᓐᑕᑯᓯᒃ ᐊᐱᓄᒋᔕᒃ ᑭᔥᐱᓐ ᐧᐊᓴ ᐅᒋ ᑲᐧᑫ ᑲᓇᐧᐊᐸᒥᐧᑲ ᒣᐧᑲ ᑭᑲᑲᓄᓇᐧᑕ.
ᑲᐱᓯᓐᑕᑎᓇᓂᐧᐊᒃ ᒪᐧᐊᒡ ᑭᒋᓀᑕᐧᑲᓐ ᑲᑲᓄᓂᑎᐧᐃᓂᒃ ᐱᒋᐧᐃᓐ ᑭᑲᑭᑭᑐᓇᓂᐧᐊᒃ. ᓇᔥᑫ ᑭᑕᐱᓄᒋᔑᒻ ᑭᑲᑲᓄᓂᒃ, ᐧᐁᐧᐁᓂ ᐱᑯ ᐱᓯᓐᑕᐤ. ᒋᐱᐊᒡ ᒋᐃᔥᐧᑲ ᑲᑭᑭᑐᒡ ᑲᔦ ᐁᑲ ᒋᐧᐊᓂᔥᐧᑫᒪᒡ, ᐁᑲᐧ ᑕᔥ ᐊᐱ ᑭᐃᔥᐧᑲ ᑲᑭᑭᑐᒡ ᐊᒋᓇ ᑲᓇᐧᐊᐸᒻ ᑫᒋᓇᒡ ᒪᔭ ᐁᑭᓂᓯᑐᑕᐧᐊᒡ ᑲᐃᔑ ᑲᐧᑫ ᐧᐊᐧᐃᓐᑕᒪᐧᐃᒃ. ᑲᐃᔑᑲᓇᐧᐊᐸᒋᑲᑌᒃ ᑲᐧᐃᓐ ᐃᑯ ᐁᑕ ᑲᑲᑭᑭᑐᓇᓂᐧᐊᒃ ᑲᔦ ᑲᐱᓯᓐᑕᑎᓇᓂᐧᐊᒃ. ᑭᒋᓀᑕᐧᑲᓐ ᒋᐯᐧᔕᐸᒪᔭᒃ ᑭᑕᐱᓄᒋᔑᒥᓇᒃ ᒋᐧᐊᐧᐃᒋᐧᐊᔭᒃ.
10
ᐧᐁᐧᐁᓂ ᐅᓂᑭᐃᑯᒪᐧᐃᓐ ᒥᓂᑯᒃ ᐁᑯᑲᔥᑭᑐᔭᓐ
ᑕᓱᑭᔑᑲ ᐊᑭᓐᒋᑫᑕᒪᐤ ᒪᓯᓇᐃᑲᓂ ᒋᐅᒋ ᐯᐧᔕᐸᒪᒡ ᑭᑕᐱᓄᒋᔑᒻ.
ᒋᐧᐃᒋ ᐅᑕᒥᓄᒪᒡ ᐅᑕᒥᓄᐧᐃᓂ ᑲᒥᐧᓀᑕᒃ ᑎᓄᐧᐃ ᐅᑕᒥᓄᐧᐃᓂ ᒋᐅᒋ ᐯᐧᔕᐸᒪᒡ ᑭᑕᐱᓄᒋᔑᒻ.
ᑲᐧᑫᒋᒻ ᒋᐧᐃᑯᑲᐧᐃᒃ ᑫᑯᓐ ᑲᐃᓇᓄᑭᔭᓐ ᑭᐧᐊᑲᐃᐧᑲᓂᒃ ᒋᐅᒋ ᐯᐧᔕᐸᒪᒡ ᑭᑕᐱᓄᒋᔑᒻ.
ᐸᐸᒥᓯᐧᐃᓐ
ᑫᑯᓐ ᑲᐸᐸᒥᓯᑲᒋᑲᑌᒃ ᐃᔑᐧᐃᑕᒪᑫᒪᑲᓐ ᑭᓇᐧᐃᑦ ᐁᑲᓇᐧᐊᐸᒥᑯᔭᒃ ᑲᑭᓇ ᑫᑯᓐ ᑲᐃᔑᒋᑫᔭᒃ. ᐃᔑᓭᓂ ᑫᐧᐃᓇᐧᐊ ᐊᐱᓄᒋᔕᒃ ᒋᑭ ᑭᑫᑕᒧᐧᐊᐸᓐ ᒋᐸᐸᒥᓯᑲᑕᒧᐧᐊᒡ ᐅᑐᑕᒧᐧᐃᓂᐧᐊ ᑲᔦ ᐅᑐᓀᑕᒧᐧᐃᓂᐧᐊ. ᒋᑭᑭᓄᐊᒪᐧᐊᔭᒃ ᐃᑕᔥ ᑲᐧᐃᓐ ᒋᐅᓂᔑᔑᒃ ᒋᐱᑯᓂᑲᑌᒃ ᐅᓇᑯᓂᑫᐧᐃᓐ ᒥᐃᒪ ᑫᐅᒋ ᑭᑫᑕᒧᐧᐊᒡ ᒋᐱᒥᐧᐃᑕᒪᓱᐧᐊᒡ ᐅᐸᐸᒥᓯᐧᐃᓂᐧᐊ. ᑲᑭᓇ ᑲᐅᓂᔑᔑᑭᓐ ᐅᓂᑭᐃᑯᒪᐧᐃ ᒪᓯᓇᐃᑲᓇᓐ ᑲᐧᐃᒋᐃᑯᓐ ᑫᐃᔑ ᐱᒥ ᑭᑭᓄᐊᒪᐧᐊᐧᑕ ᑭᑕᐱᓄᒋᔑᒪᒃ ᐧᐁᐧᐁᓂ ᒋᐱᒥᐧᐃᑕᒪᓱᐧᐊᒡ ᑲᑭᓇ ᑫᑯᓐ ᑲᐃᔑᒋᑫᐧᐊᒡ. ᑭᑭᓄᐊᒪᐧᐊᐧᐊᓱᐧᐃᓐ ᐊᓐᑕᐧᐁᑕᐧᑲᓐ ᐧᐁᐧᐁᓂ ᒋᓇᓇᑲᑕᐧᐁᑕᐧᑲᒃ ᑲᔦ ᒋᐅᓇᒋᑲᑌᒃ ᔕᑯᒡ ᐊᐱ ᑭᐊᓂ ᑭᑫᑕᒪᓐ ᑫᐃᔑᐱᒪᓄᑲᑕᒪᓐ ᑲᑭᐊᓂᐧᐁᓐᒋᑐᓐ ᑲᔦ ᑭᑕᐱᓄᒋᔑᒻ ᑫᐧᐃᓐ ᐅᑲᐊᓂ ᐧᐁᓐᒋᑐᓐ. ᐅᓂᑭᐃᑯᒪᒃ ᐸᐸᒥᓯᐧᐊᒃ ᒋᑲᐧᑫ ᓂᓯᐧᐁᑕᒧᐧᐊᒡ ᐊᓂᓐ ᑫᑭᐃᔑ ᐅᐱᑭᐊᐧᐊᐸᓐ ᐅᑕᐱᓄᒋᔑᒥᐧᐊ ᑲᔦ ᑕᔥ ᒋᑭ ᑲᐧᑫ ᑭᑫᑕᒧᐧᐊᐸᓐ ᒋᓇᓇᑐᔥᑲᒧᐧᐊᒡ ᒋᐧᐃᑐᑲᐧᐃᐧᑕ.
ᐧᐁᑯᓀᓐ ᐁᐅᒋᐧᐃᒋᐃᐧᐁᒪᑲᒃ ᐧᐁᐧᐁᓂ ᑲ ᑲᑭᑭᒪᐊᐧᓱᓇᓂᐧᐊᒃ
11
ᐊᐱᒋ ᐸᑎᓇᑎᓐ ᐧᐃᑕᒪᑫᐧᐃᓐ ᐊᓂᓐ ᑫᑭᐃᔑ ᐅᐱᑭᐊᐧᐊᓱᓇᓂᐧᐊᑭᐸᓐ ᑲᔦ ᓂᐱᐧᐊ ᐊᔭᒪᑲᓐ ᑫᑭ ᑲᐧᑫ ᑭᑫᒋᑲᑌᑭᐸᓐ ᐅᐅᐧᐁ ᑲᑎᐸᐊᒪᑯᐧᐃᓂᐧᐊᒃ ᐊᓄᑭᐧᐃᓐ, ᐁᐁ ᑌᐧᐯ ᑎᐸᐊᒪᑯᐧᐃᓂᐧᐊᓐ. ᑲᐧᐃᓐ ᑲᔦ ᑭᓀᑕ ᑭᑕᐯᔑᑯᑲᓯᓐ. ᑲᑲᓄᔥ ᑲᑌᐸᑫᓂᒪᒡ. ᑲᔦ ᒋᐯᐧᔕᐸᒪᐧᑕ ᐊᐧᐃᔭᒃ ᑲᓂᑕᐧᐃᒋᐧᑕᐧᐊᒡ ᑲᔦ ᑲᑭᑫᑕᓱᐧᐊᒡ. ᐊᐱᓄᒋᔥ ᐧᐃᑐᑲᑫᐧᐃᓂᒃ ᐃᔑᑲᐧᑫᐧᑌᓐ ᒋᒥᑭᑯᔭᓐ ᒪᓯᓇᑌᓯᒋᑲᓇᓐ, ᒪᓯᓇᐃᑲᓇᓐ, ᑭᑭᓄᐊᒪᑫᐧᐃᓇᓐ ᑲᔦ ᑲᐃᔑ ᒪᒪᐧᐃ ᐧᐊᐧᐃᑐᑲᓱᐧᐊᒡ ᐅᓂᑭᐃᑯᒪᒃ.
ᑭᔥᐱᓐ ᐧᐃᒋᐧᐊᒡ ᑭᑕᐱᓄᒋᔑᒻ ᐊᑕᐧᐁᐧᐃᑲᒥᑯᒃ, ᓂᑲᓐ ᐧᐃᓐᑕᒪᐤ ᐊᓂᓐ ᑫᐃᔑᑭᑫᑕᒃ. ᐧᐃᓐᑕᒪᐤ ᐊᓐᑎ ᐁᔕᔭᓐ ᑲᔦ ᐧᐁᑯᓀᓐ ᑲᔦ ᐧᐃᑕᒪᐤ ᐊᓂᓐ ᐁᔑᐸᑯᓭᓂᒪᒡ ᒋᑐᑕᒃ. ᒥᐅᒪ ᑫᐅᒋ ᐧᐃᒋᐃᑯᒡ ᑫᐃᔑ ᐧᑲᔭᓐᑌᑕᒃ ᑫᑐᑕᒃ ᐊᑕᐧᐁᐧᐃᑲᒥᑯᒃ ᑲᐧᐃᐃᔑᐧᐃᓇᒡ ᑲᔦ ᒋᐅᒐᓂᒥᒋᑫᓯᒃ. ᑭᔥᐱᓐ ᐊᐸᓐ ᐅᒋ ᑭᒋᓂᔥᑲᑎᓯᒡ ᑲᐃᔑ ᐸᑎᓂᓇᓂᐧᐊᓂᒃ, ᑭᑎᓀᑕᓇᑐᒃ ᐁᐧᐃᐸᑭᑌᐧᐊᒡ ᑫᒪ ᒋᑭᒋ ᑲᑲᓄᓇᒡ ᐁᐧᐃᑕᑕᑯᓯᒡ. ᑭᔥᐱᓐ ᑕᔥ ᐧᐃᓐ ᑭᑌᓂᒥᐧᐁᐧᐃᓂᒃ ᐃᓇᓇᑲᑕᐧᐁᑕᒪᓐ ᒋᓂᓯᑕᐧᐁᓂᒪᒡ ᐧᐁᑯᓀᓐ ᐊᐱᒋ ᑲᐅᒋ ᐊᓂᒥᓯᒡ ᒪᑭᔕ ᑭᓇᐧᐃᐃᔑᒋᑫᑐᒃ, ᐊᔦᑯᓯᑐᒃ ᑫᒪ ᐧᐃᐧᐃᓯᓂᑐᒃ. ᐅᓐᒋᑕ ᐱᑯ ᑫᑯᓐ ᐃᔑᔭᑐᒃ ᐃᐃᐧᐁ ᑲᐅᒋ ᐊᓂᒥᓯᒡ. ᔕᑯᒡ ᑲᐧᐃᓐ ᐅᓂᔑᔑᓐ ᐃᐃᐧᐁ ᒋᑭᑐᑕᑭᐸᓐ. ᒋᑲᐧᑫ ᓂᓯᑐᑕᒧᓇᒡ ᐃᑕᔥ ᑭᔥᐱᓐ ᑲᐊᓂᒥᓯᒡ ᑲᐧᐃᓐ ᒋᐅᓂᔑᔑᒃ ᐃᐃᐧᐁ ᒋᑐᑕᒃ. ᔐᒪᒃ ᑭᑕᐃᔑᒋᑫ ᒋᐅᑕᐱᓇᒡ ᒋᐃᔑᐧᐃᓇᒡ ᑲᐃᔑ ᑯᔥᑲᐧᐊᑌᑕᐧᑲᓂᒃ ᒋᑕᔑᑭᔥᑯᐧᐁᐊᒡ. ᓇᔥᑫ ᒪᒋᐧᐃᓇᒡ ᐃᐃᒪ ᑲᑭᑕᔑ ᓂᔥᑲᑎᓯᒡ, ᑭᑐᒋ ᑭᑭᓄᐊᒪᐧᐊ ᒋᒪᓇ ᒥᑯᔥᑲᒋᐃᐧᐁᒡ ᑲᔦ ᑲᐧᐃᓐ ᑕᑭᐅᒋ ᐸᑭᓇᑫᓯ ᑫᒪ ᑲᐧᐃᓐ ᑕᑭᔕᑯᒋᐃᐧᐁᓯ ᐊᓇᑭ ᑭᒋ ᐊᐃᐧᓀᑲᓱᒡ ᑲᔦ ᐁᑭᒋᐸᐸᒥᐧᑲᔥᑯᓂᒡ ᑲᐃᔑᐸᑎᓂᓇᓂᐧᐊᓂᒃ. ᐁᑯ ᑲᔦ ᑭᑕᐃᔑᒋᑫ ᒥᓇᐧᐊ ᐅᐧᐁ ᒋᑐᑕᓯᒃ ᐊᐱ ᒥᓇᐧᐊ ᐧᐃᒪᒋᐧᐃᓇᒡ ᐱᓇᒪ ᓂᑲᓐ ᐧᐁᐧᐁᓂ ᐁᑭᐊᐧᓀᔑᒃ ᑲᔦ ᐁᑭᐊᔕᒪᒡ ᑲᔦ ᑕᔥ ᒋᐱᒥ ᓇᓇᑲᒋᐊᒡ ᑕᐱᔥᑯ ᐧᐁᐧᐁᓂ ᒋᐱᒥ ᑲᑲᓄᓇᒡ.
12
ᐧᐁᐧᐁᓂ ᐅᓂᑭᐃᑯᒪᐧᐃᓐ ᒥᓂᑯᒃ ᐁᑯᑲᔥᑭᑐᔭᓐ
• ᓇᓇᑲᒋᑐᓐ ᐱᑯ ᑫᑯᓐ ᐧᐃᓐᑕᒪᑫᐧᐃᓐ ᑲᐅᓐᑎᓇᒪᓐ ᒋᑌᐧᐯᒪᒃ. ᐯᔑᐧᑲᔦᒃ ᑫᑭᑐᑕᒪᐸᓐ ᒋᑭ ᑲᐧᑫᐧᑌᔭᐸᓐ ᑲᓂᑲᓂᔥᑲᒃ ᑭᑭᓄᐊᒪᑫᐧᐃᓂ ᐊᔭᐧᑫᓐ ᐅᓂᑭᐃᑯᒪᐧᐃ ᑭᑭᓄᐊᒪᑫᐧᐃᓂ. ᑕᐱᔥᑯ ᐧᐃᓇᐧᐊ ᑲᑭᑫᑕᒧᐧᐊᒡ ᑫᐃᔑ ᑭᑭᓄᐊᒪᑫᐧᐊᒡ ᐅᓂᑭᐃᑯᒪᐧᐃᓂ. ᑫᑯᐧᐃᓐ ᔕᐧᑫᓂᒧᑫᓐ ᒋᑲᐧᑫᐧᑌᔭᓐ. • ᑫᑯᐧᐃᓐ ᔕᐧᑫᓂᒧᑫᓐ ᑭᔥᐱᓐ ᑭᑎᓇᐧᐁᒪᑲᓇᒃ ᑫᐧᐃᓇᐧᐊ ᐸᑲᓐ ᐃᔑᐱᐧᐃᑐᐧᐊᒡ ᐅᑐᐱᑭᐊᐧᐊᓱᐧᐃᓂᐧᐊ. ᑲᑭᓇ ᑲᑕᓱ ᐊᔭᓂᑫ ᐱᒪᑎᓯᐧᐊᒡ ᐯᐸᑲᓐ ᐅᑎᔑᐱᒥᐧᐃᑐᓇᐧᐊ ᐅᑐᐱᑭᐊᐧᐊᓱᐧᐃᓂᐧᐊ. ᑲᐧᑫᒋᒥᒃ ᑭᑎᓇᐧᐁᒪᑲᓇᒃ ᒋᐧᐃᒋᐧᐃᐧᑲ ᐅᓂᑭᐃᑯᒪᐧᐃᓐ ᑲᐃᔑ ᑭᑭᓄᐊᒪᑲᓂᐧᐊᒃ, ᑫᒪ ᒋᐅᒋ ᐧᐃᓐᑕᒪᐧᐊᐧᑕ ᑕᓯᓐ ᑫᑯᓇᓐ ᑲᑭᐅᒋ ᑲᑭᑫᑕᒪᓐ ᐅᐅᒪ ᑭᑭᓄᐊᒪᑫᐧᐃᓂᒃ. • ᑲᓂᑫᓐ, ᐅᐱᑭᐊᐧᐊᓱᐧᐃᓐ ᑲᐧᐃᓐ ᔐᒪᒃ ᒋᑭᑲᔥᑭᒋᑲᑌᒃ ᑲᔦ ᔕᔑᐯᑕᐧᑲᓐ.
ᐅᓂᔑᔑᓐ ᒋᑲᐧᑫᐧᑌᔭᓐ ᑫᑯᓐ, ᐊᓂᔥ ᑲᑭᓇ ᐊᐧᐃᔭ ᐅᑕᔭᓐ ᑲᐧᑫᐧᑌᐧᐃᓂ.
13
ᐧᐁᑯᓀᓐ ᐁᐅᒋᐧᐃᒋᐃᐧᐁᒪᑲᒃ ᐧᐁᐧᐁᓂ ᑲ ᑲᑭᑭᒪᐊᐧᓱᓇᓂᐧᐊᒃ
www.cwlc.ca
This document is © 2009 by admin - all rights reserved.
Fichier attaché
Taille
PPES_pamphlet_Ojib.pdf
5.83 MB
Keywords
promotion de l'éducation et du soutien au rôle parental
Aboriginal
Abuse
Mental health
Parenting
Prevention
Professional
promoting parent education & support
Research
Rights
Violence
more tags
